شعرترکی گئتمه ترسا بالاسی

شعرترکی گئتمه ترسا بالاسی

ایذن وئر توی گئجه‌سی من ده سنه دایه‌گلیم

ال قاتاندا سنه مشاطّه تماشایا گلیم.

 

سن بو آیلی گئجه‌ده سئیره چیخان بیر سرو اول.

ایذن وئر من‌ده دالینجا سورونوب سایه گلیم.

 

منه ده باخدین او شهلا گؤزوله ، من قارا گون،

جورئتیم اولمادی بیر کلمه تمنّایه‌ گلیم.

 

من جهنم‌ده ده باش یاسدیقا قویسام سنیله ،

هئچ آییلمام کی دوروب جنّت مأوایا گلیم.

 

ننه قارنیندا سنله ائگیز اولسایدیم اگر.

ایسته‌‌مزدیم دوغولوب بیرده بو دونیایا گلیم.

 

سن یاتیب جنتّی رؤیادا گؤرنده گئجه‌لر،

من ده جنتّده قوش اوللام ، کی او رؤیایا گلیم.

 

قیتیلیغ‌ ایللر یاغیشی تک قورویوب گؤز یاشیمیز،

کوی عشقینده گرک بیرده مصّلایه گلیم.

 

سنده صحرایه ماراللار کیمی بیر چیخ نولوکی

منده بیر صئیده چیخانلار کیمی صحرایه گلیم.

 

آللاهیندان سن اگر قورخماییب اولسان ترسا،

قورخورام منده دؤنوب دین مسیحایه گلیم.

 

شیخ صنعان کیمی دونقوز اوتاریب ایللرجه،

سنی بیر گؤرمک اوچون معبد ترسایه گلیم.

 

یوخ صنم ! آنلامادیم ، آنلامادیم ، حاشا من ،

بوراخیب مسجدیمی ، سنله کلیسایه گلیم!

 

گل چیخاق طور تجلاّیه ، سن اول جلوه‌ای طور،

من‌ ده موسا کیمی اول طوره تجلاّیه گلیم.

 

شیردیر شهریارین شعری الینده شمشیر،

کیم ، دئیر من بئله‌ بیر شیریله دعوایه‌ گلیم ؟

 

لینک کوتاه مطلب: http://gozaltabrizim.com/GozaLqf34N
این مطلب را هم ببینید...
هارا قاچسین اینسان
دیدگاه خود را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

1 + نه =

بالا